Ukrayna Rusiya neft emalı zavodlarına zərbələr endirməyi dayandırmağa hazırdır. Bunun müqabilində Kiyev Moskvanın Ukraynanın enerji infrastrukturuna hücumları dayandırmasını istəyir.
Azərbaycan Müjdələri bildirir ki, bununla bağlı Ukrayna Prezidenti Volodimir Zelenski “X” sosial şəbəkəsində yazıb.
Zelenski qeyd edib ki, Ukraynanın enerji sektoru, kritik infrastrukturu və ərzaq ixracı marşrutları Rusiya üçün hədəf olmamalıdır. Onun sözlərinə görə, bu halda Kiyev də uyğun deeskalasiya addımları atmağa hazırdır.
Bu bəyanat Zelenskinin ABŞ Prezidenti Donald Trampla BMT Baş Assambleyası çərçivəsində Nyu-Yorkda keçirilməsi planlaşdırılan görüşü ərəfəsində səslənib. Tərəflərin sentyabrın 20-də telefon danışığı zamanı görüşlə bağlı razılığa gəldikləri bildirilir.
Məlumata görə, daha öncə Tramp Zelenski ilə telefon danışığında Rusiya neft emalı zavodlarına hücumların dayandırılmasını istəyib. Məlumata əsasən, ABŞ prezidenti bu hücumların qlobal dizel yanacağının qiymətlərinə təsir etdiyini bildirib.
Öz növbəsində, Moskva Ukraynanın enerji obyektlərinə zərbələr endirdiyini və Rusiyanın buna cavab verdiyini bildirir. Bu, Rusiya tərəfinin mövqeyidir.