“Rosselxoznadzor” 2026-cı il iyunun 12-dən etibarən mənşə ölkəsi və göndərilmə yeri Ermənistan olan bütün karantin nəzarətindəki məhsulların Rusiyaya idxalını, həmçinin onların Rusiya ərazisindən Avrasiya İqtisadi Birliyinə (AİB) qoşulan dövlətlərə tranzitini məhdudlaşdırır.
Azərbaycan Müjdələri bildirir ki, bununla bağlı iyunun 11-də “Rosselxoznadzor”un mətbuat xidməti məlumat yayıb.
Bildirilib ki, qadağa göndərilən məhsulların təhlükəsizliyini və izlənilə bilənliyini təmin edəcək konkret mexanizm hazırlanıb tətbiq olunana qədər qüvvədə qalacaq.
Qərarın karantin obyektlərinin mütəmadi şəkildə aşkarlanması ilə əlaqədar qəbul edildiyi qeyd olunub. Məlumata görə, xidmət bu ilin may ayından başlayaraq, Ermənistan mənşəli karantin nəzarətində olan bir sıra məhsul növlərinin idxalına mərhələli şəkildə məhdudiyyətlər tətbiq edib, eyni zamanda tədarüklərdə aşkar edilən pozuntularla bağlı Ermənistan tərəfinə dəfələrlə məlumat göndərib.
Ancaq görülən tədbirlərə baxmayaraq, təhlükəli karantin obyektlərinin aşkarlanması halları davam edib. Təkcə iyun ayında Ermənistandan göndərilən qoz, qurudulmuş şaftalı və pomidor məhsullarında üç ayrı halda kapr böcəyi aşkarlanıb.
“Rosselxoznadzor”un açıqlamasında vurğulanıb ki, bu faktlar Ermənistanın aidiyyəti dövlət qurumları tərəfindən gərəkli nəzarətin həyata keçirilmədiyini göstərir və ölkənin fitosanitar sertifikatlaşdırma sisteminin etibarlılığı ilə bağlı ciddi suallar yaradır.
Qurumda düşünürlər ki, Ermənistanın bitki mühafizəsi və karantin xidmətinin effektiv olmayan fəaliyyəti həm Rusiyanın, həm də AİB-yə qoşulmuş dövlətlərin fitosanitar təhlükəsizliyi üçün birbaşa risk yaradır.